النيشابة

النيشابة
سلاح بدائي بسيط يسمى بالديري نشابة وبالشامي نقيفة
يستخدمونو أكثر شي بالدير أهالي الجورة والحميدية والمطار والصناعة والدير العتيق
أما بالقصور يندر وجودو
طبعاً كان أولي ويلاد الأحياء القديمة يستخدمونها مشان صيد العصافير والحمام ..
...
لما يطلع ولد زغير جديد عالساحة ... يحطولو نيشان لازم يصيبو كازوزة بلورة بيت شي واحد يكرهونو ..

مع تطور الزمن وازدهار الشوارع بالاضاءة صار النيشان عالاضوية
اللي يصيب يربح
مكونات النشابة الديرية
قوس خشب سبعاوي أو خمساوي حسب الطريقة المعترف بيها بين أهالي الحي
يسمونو المجداح
كلاش ديري عتيق مشان شقفة رقعة وهي الحاظنة تبع الحجرة
جراب بسكليت تقص منو شريطين مطاطية ..وتخيطها عالجلد السميك الحاظن للحجرة
وهيجذ تصير النشابة جاهزة للاستعمال والأذية
وبعض الأحياء تبع الزناكيل المتفضين يحطون خرزة وبسامير ملونة مشان الزينة والفخفخة
بعد اعداد النشابة ..لازم الواحد يتوجه للخبير تبع الحارة مشان يجربلوياها ويشوف شكون بيها ما بيها واذا بيها أخطاء يصححها ويسويها زين
أحلى شي بالحارة لما يجي ولد غشيم ما يعرف يشتغل بالنشابة ..وهو يلقم الحجرة ويشد تا يخبط الهدف يقوم ينقطع المطاط ويسفقو بوجهو
وبي بعض الويلاد المؤذين لما يعلمون واحد شلون يضرب بالنشابة يخلونو يوجه القوس على وجهو ..يقوم يضرب حالو
وانوب لما الواحد تكون ايدو عرقانة يفلط معاه النقف ويتصوب وجهو
وياما ياما شفنا ناس تفشخت من هالنشابة الكشرة
تفوت عالحارة تليقي كل منو حيط نشابتو بصفحتو ...
واياك تزور ...وإلا تتكسر سيارتك ...ينفشخ راسك ..
ساعتها ما ينفع الندم
واذا طلعت سالم غانم تكون امك ديعيتلك .
أنا أذكر من حارتنا المخترع عهد
كان يروح عالصناعة يفصل قواس حديد
ويجون الويلاد يوصونو عالنشابات حديد (( هاي الحديد خاصة بويلاد القصور الأكابر )) لانو كانت غالية شوي
كانت النشابة الحديد الخمساوية بخمسطعش والسبعاوية بعشرين
واذا يعفرك زين .. يبيعك ام الخمسطعش ثنين بخمسي وعشرين
وبدك توصي عليها قبل ثلت تيييم مشان تجهزلك
أم الآن تطورت الدنيا وصار السلاح الحقيقي الجديد اللذي حل مكان النشابة هو فرد الخرز"" و البكشن ""
أسلحة عيار وسط تفي بالغرض , والايذاء.
واحدى حبابات دير العتيق لما راحت عالحج ...فصللها الله يوفقو ابن بنتها نشابة مشان ترجم ابليس .

تقول هالحبابة ..والله ضربتو ست حجرات والسابعة مرت حمامة صليصلي واجت بنص عينها ونزلت مع بليس...